9 май – Жеңіс күні.

9 май – Жеңіс күні. Жеңіс Ұлы Отан соғысы ардагерлерінің қаһармандық ерлігімен,  жерлестеріміздің қанымен, табан ет, маңдай терімен келді. 

Осыдан 75 жыл бұрын ата-бабаларымыз Отаны үшін, елі үшін жан аямай соғысқан болатын. Барша халықты дүрліктіріп, баланы ата-анадан, ананы бауыр еті баласынан, ерінен айырған да осы сұрапыл соғыс. 

Міне, осы алаулаған Жеңіске, бүгінде, 75 жыл толып отыр. Гимназиямыздың оқушыларымен бірге «Бақыт гүлін терген күн» тақырыбында жоспарланған кезекті креативті апталығымыз да өз жалғасын тапты. Гимназия оқушылары «Жеңіс» сөзінің терең мәнін аша білді. Мектеп оқушылары соғыс ардагерлерін еске алып, солар жайлы мәліметтер айтты. «Ешкім де, ешқашан ұмытылмайды» деп ұрандап, әр оқушы өзінің патриоттық сезімімен   ардагерлеріміздің ерліктерін айтып, өткенге  көз жүгіртті.

Әр сынып Ұлы Жеңіске арнап өлең жолдарын оқып, қызықты бейнежазбаларымен бөлісті. Бастауыш сынып оқушылары шығармашылық қабілеттерін шыңдап, өз жұмыстарында өртке оранған,  соғыстағы қан майданды бейнеледі.

Ғасырдан ғасырға өтіп, тарих шежіресіне талай ерлік пен қаһармандардың үлгілері жазылар. Бірақ, солардың ішінде Ұлы Отан соғысында ерлік көрсеткен азаматтарымыздың өшпес өнегесі  мәңгі жарқырай береді. Соғыста ерлікпен қаза тапқан азаматтарымыздың қаһармандық рухы ұрпақтар есінде мәңгі сақталады.

Атадан мирас болып қалған осынау байтақ Отанымызды - бабаларымыз ғасырлар бойы ақ білектің күшімен, ақ найзаның ұшымен қорғап, көзінің қарашығындай сақтап, бүгінгі ұрпаққа жеткізді. Ендеше, сол қастерлі аманатты сақтау – біздің асыл парызымыз!                                 

1945 жылдың 9 майы... Жылдан-жылға алыстап бара жатқан мерзім. Дей тұрғанмен, Ұлы Жеңістің анық бағасы мен маңызы біздің жадымызда мәңгі орын алған деуге болады.    Бұл мереке – жанқияр ерліктің, еңселі елдіктің рухы өрлеп, Жеңіс жалауы желбіреген күн. Бүгінгі тәуелсіздік тұғырының берік, еңсеміздің биік болуы да, еліміздің өркендеуі  – осынау мерекенің жемісі.

          Жеңіс тойы –– ең қымбатты, қуанышты да қайғылы, мәртебелі мереке, халқымыздың ерлігі мен даңқының жарқын көрінісі болып табылады. Халқымыз әрдайым Отанымызды  қорғаған батырларды еске алып, олардың ерліктерінің алдында басын иеді. Біздер де қадірлі ардагерлерге бейбіт өміріміз бен бақытты болашағымыз үшін алғысымызды білдіреміз!

 Бүгінгі ұрпақ   аға буын - ардагерлер танытқан қаһармандық пен қайсарлықтан үлгі алып, бой түзейді. Осынау ерлікке толы күн   туралы «Жеңіс балалар көзімен» атты балалар шығармашылығын ұсынамыз.