Ақ жол, Жас түлек-2020!!!
Ағымдағы жылдың 3 күні Тараз қаласы Әлихан Бөкейханов атындағы №1 гимназиясында 2019-2020 оқу жылындағы 11 сынып оқушыларының мектепті бітіргендігі туралы аттестат алу салтанатты іс-шарасы болып өтті. Түлектерге аттестат тапсыру салтанаты пандемияға байланысты күшейтілген санитариялық-дезинфекциялық режимде, бекітілген тәртіпке сай өткізілді. Түлектер арасында арақашықтық, маскалық режим және қатысушылар санын шектеу талаптары сақталды.
Соңғы қоңырауды соғу мәртебесі мектеп түлектері: Қыйрабаева Диана, Азимов Азамат, Табурова Ситора, Сәбит Алиасқар, Жорабек Аяжанға берілді.
Аттестаттарды салтанатты түрде гимназия директоры Л.Ә.Қызылғұлова түлектерге табыстап, алдағы өмірлеріне сәттілік тіледі. Биыл алтын ұямыздан 49 түлек түлеп ұшты, оның ішінде 3 түлек «Алтын белгі» иегерлері: Алибаев Ельнур- физика пәнінен облыстық олимпиада жүлдегері, қалалық физика пәнінен ғылыми жоба жүлдегері. Азимов Азамат - биология пәнінен қалалық және облыстық олимпиада жүлдегері. Табурова Ситора- география пәнінен қалалық және облыстық олимпиада жүлдегері, Республикалық КИО олимпиадасының 3 орын иегері.
Іс-шара барысында ата-ана Идрисова Лаззат Габдуллақызына сөз беріліп, үлкен өмірдің кілті іспеттес болатын құжаттарын қолдарына алған оқушыларға ақ жол, талмас қанат және сәттілік тілей отырып, алдағы сынақтан сүрінбей өтулеріне тілектестік білдірді.
11 жыл бойы білімнен бас алмай, ата-анасы мен ұстаздарының сенімін арқалап, өз тағдырлары үшін аса жауапты жолға аттанған мектеп бітірушілерінің қадамына -құт, жолына-сәт сапар тілейміз!
